隨機出現token小程式

 以早有寫過點名程式，是android的apk app。功能小無必要予使用者裝佇手機，而且夯iOS的人真濟，按呢做總是無蓋好。web app技術出名甲紅吱吱，若是小程式用javascript html寫就有夠囉。程式其實只是隨機出現token啦，若讀入檔案，檔案必需是文字檔。格式是一列算一个token，空白逝毋免算。手機操作的話，愛先將檔案囥佇手機檔案系統讀會著的所在。若無欲讀入檔案，選內定數字或者改數字增加入去menu，才閣選著的時揤手機的enter就OK，縮小字點一下，放大快點2下，按呢說明應該有夠清楚矣。本小程式免網路會當佇桌機筆電運作，只要將html存佇桌機筆電就OK。手機因為無法度對系統讀檔案，所以目前有困難。但是有另外一个browser可以，無試過嘛無普遍，煞去矣。

程式就囥佇 https://sindailo.tw/randomtext.html 無任何版權，請自由播送予需要的人。

感謝藍白營替咱復習3冬防疫歷史

"台北是疫情開始"，這句話已經袂使講囉。人上無愛予人貼歹的標籤，所以你若是台北人，一定想著就氣。起點是武漢，是世界公認，中國勢力大，有法度予世界衛生組織莫叫武漢肺炎。咱煞叫日本腦炎、德國麻疹叫甲誠自然。藍白營(敖力--gâu)用二分法，毋是敵人就是同志，將別人的話刣頭切尾，就賰(chun)仇恨。看世界防疫，台灣協助各國喙罨足濟人袂記去矣。咱買疫苗予中國擋連德國官員都看袂過，所以才有民主日本美國送咱疫苗，彼時陣猶有人講彼是欲過期矣的反日言論。世界欲開國門拼經濟，只賰中國猶咧清零管制，毋夠嘛咧欲擋袂牢矣。真大的可能是明年中國大爆發，來到小可正常的政治思維。

新台羅網站徒去digitalocean囉

 新台羅網站sindailo.tw本來攏囥佇厝內，用吔是hinet的固定ip配合domain name。三不五時停電或者主機重灌，總是會有服務不週的所在。這个網站應該是拼音學習上簡單吔，配合英語佮日語，毋免另外轉踅頭殻--明明是 d 音，煞愛注作 t 。另外安全性要求愈來愈懸，用Let's Encrypt 的安全憑證來保護嘛是一个方法。主機ip是159.89.231.150，相關資訊是根配合xxxxxisKxxx。

轉去鳥嶼行行咧

 做兵了後轉去澎湖教冊的時，拄好鳥嶼欲成立國中。校長第一个想著吔就是我這个菜鳥上好教閣聽話，就派我去做分部主任。佇遐國小老師攏有宿舍通蹛，國中老師2个，其中一个查某吔嘛是借國小宿舍蹛。我蹛佇衛生室吳采蘋護士的厝，伊無共我收厝稅。3冬外前就想欲轉去看看咧，看有啥乜變化？街頭巷尾行3逝我已經揣無厝頭家的厝矣，敲line電話予厝頭家後生鄭學豪，伊竟然嘛拄好對高雄轉去鳥嶼看媽媽，經由伊順利揣著厝頭家。進前揣鳥嶼國中，位置錯誤指向山頂，雖然鳥嶼無山。順紲提出修改要求予google，將地址白沙鄉1號加上鳥嶼村變做白沙鄉鳥嶼村1號，竟然馬上通過。真感謝google，予咱社會愈開放方便逐家。這張是搜尋的半結果，就是成功改變位置但是猶未完全反應佇畫面的情形。紅點是本來搜尋的位置，紅字鳥字下跤是咧欲改變過來的所在。

下跤這張是完成改變的搜尋結果

ANTLR 第4版 的新功能

 編譯器上長歲壽的應該是 antlr 吧，自伊出版到這馬已經第4版了。而且第4版本身嘛咧欲十冬了。網路上揣著的資料真大部份猶是第3版，欲測試閣特別掠第3版jar檔案。第4版上重要吔是伊開始支援倒手爿遞廻，倒手爿遞廻是LL(k)上大的禁忌。伊會拍破這條規則，表示編譯知識愈來愈普及囉。欲自定編譯功能佮規

則，有2个模式會使用。分別是walker佮visitor。walker徛基佇listener，每一條ruleNode規則配合2个呼叫函式：enterRule、exitRule，家己寫的程式碼Walker只要繼承ProgBaseListener，而且寫好這2條函式程式碼，一切就OK了。visitor較麻煩，愛先落標簽，用#符號𤆬頭。然後愛閣寫真濟的函式佮Context觀念配合，算起來已經是專業程度才會曉。

予你驚死我上爽

台灣神童柯文哲講咱上濟一工50萬人確診，毋知伊的根據是啥乜？香港足濟所在佮台灣相仝，攏講漢語用正體字。衛生條件佮咱嘛差無濟。人口7百外萬比北北基桃減一寡，in上濟的時7工平均是6萬5千外人。照人口比例3倍來看，咱北部以外人口密度較小，所以傳染率應該袂到3倍，也就是台灣一工上濟7工平均是13萬左右。但是香港無啥庄跤，疫情真緊就降落來，咱國疫情曲線無香港的崎，範勢免到2倍13萬就到天頂矣，但是疫情嚴重時間顛倒會較久。有好有䆀，好處是醫療量能會堪俐。䆀的恁攏知影囉。這是個人看法，莫當作真吔。

直寫橫寫綜合上好例

一般直寫是對正爿開始向倒爿行，但是若拄著2種攏需要的時，猶原正爿開頭看起來就怪怪囉。這時陣愛改做佮橫寫相仝才會合目睭視線，看這个mesi就知影了。