google 的 gmail app 設定雙重口座收批

gmail app頂一站又閣進化了，會當收gmail本身的批閣會當收google app口座的批，甚至其他公司的批箱嘛OK。欲設定會當收第2批箱口座，gmail app必須是上新的版本。先去play商店將恁的gmail app更新到上新的版本。紲落來入去gmail，
1：揤主選單

2：點現有口座

3：點新增帳戶

4：點goolge (若是其他公司的口座點個人) 了後揤繼續

5：點現有帳戶

6：拍入口座佮密碼

經過以上的簡單6步，照伊的指引佮說明就會當設定完成了，恭喜！

這幾冬來報稅看自由軟體悲哀

報稅一向是自由軟體支援者的疼，到這馬猶無法度用linux系統來報。最近手機平板電腦使用者誠濟，財政部嘛有出手機版試算軟體佮報稅軟體。掠來試看覓是毌是好用，查詢資格佮報煞是會用咧，但是欲掠家己的資料就有問題了。因為伊愛配合中華電信的藍牙讀卡機，網路市面上買無。另外報稅軟體是會當掠落來，但是煞無法度裝。試過LG G2佮sony xperia 3這二支攏相仝，毌知財政部有建議會當安裝的機型無?或者是囥好看安慰老百姓用吔?最後也是乖乖去揣window系統報了，厭氣啦～～！！

2018(107)課綱資訊佮科技南區諮詢會議簡單報

十二年國民教育佇2018開始增加資訊佮科技領域，對國小３年開始到高二止加２節。因為大部份的學校本來就用彈性課程排電腦課，所以無影響資訊課。但是生活科技排佇自然課內面，國中部份足濟老師因為按呢"自然"就無教矣！獨立出來了後就有課本，欲無教無啥可能。但是按呢自然課有可能會減一節，或者用彈性課程加上一節變作原來的４節。以７年級來講，９年一貫以前生物本來上３節，９年一貫了後變做４節。經過科技加入教學現場，世界行向科技反變教室，各科教學時數會當減少了。將加出來的時間留予學生自動學習，行向自動學習提升整體的效果，老師角色由主教者變作輔導者，遮才是教育的上懸境界。另外科技課上課的場所可能愛特別安排，無一定愛佇電腦教室，但是可能用著較濟的資訊設備，學校佇相關的配合設備愛提早準備才有法度應付變化遮緊的教育現場。

課綱用詞以往的軟體硬體的分類予系統平台取代了。因為這馬軟體和硬體結合了誠峇，硬將伊拆開無適當，毌過軟體硬體對嵌入式系統來講亦是誠適合，因為伊會當自由換系統軟體。另外演算法平常較少用的名詞攏出現了，目的是反應所用的技術佮解決問題的過程爾爾。

google script api管理功能有改變

google script api佇管理方面的功能有改變，造成舊的程式無法度執行。愛改寫程式才會當合用。尤其佇使用者口座的管理佮密碼變更方面閣較愛注意。本來的user.setPassword(pass)無法度用了，愛改做user.password = pass才會使。user.setChangePasswordAtNextLogin(true)嘛愛改做user.changePasswordAtNextLogin = true才ＯＫ。尾後加上AdminDirectory.Users.update(user , email)才有真正做更新的動作喔！google遮仔改變揣無文件好參考，執行嘛無錯誤提示。開足濟時間慢慢仔揣才揣出這个結果。毌過袂使嫌google矣，畢竟伊提供咱教育單位容量無限制的空間予咱免開錢運用，講一聲勞力。