新台羅拼音符號－真正適合咱台灣學生使用的拼音方案

教育部幾冬前整合各種拼音方案做成台羅拼音，做為認證的唯一標準。台語網站嘛用台羅拼音標注。這是妥協之下的結果，毋過煞造成第一線教師教學和學生學習的困難。按怎講？因為咱學生攏有學英語，台羅拼音有差不多有7个是佮英語音標無仝的，學生欲學這種拼音定定拂毋著去，連老師三不五時嘛會出差錯。所以應該將遮仔會出差錯的符號改回佮英語仝款。若按呢學生根本無啥需要另外記無仝的符號，嘛袂定定拂毋著去。經過按呢的修改，大概愛另外學的符號只有3个爾爾。